الشاعر المبدع / عبدالله محمد خير

المدير العام تاريخ التسجيل : 24/04/2008 العمر : 31

الشاعر المبدع /عبدالله محمد خير يعتبر من المنارات السامقة فى شعراء الشايقية وله العديد من القصائد التى يتغنى بها فنانى الشمال وقد شكل ثنائية رائعة مع الفنان كروان الشمال الاستاذ/ صديق احمد الذى تغنى بالكثير من روائع الاستاذ عبدالله محمد خير . اننا نتهز هذه السانحة وبمناسبة شهر رمضان الكريم نرفع الاكف الى الله سبحانه وتعالى ان يديم الصحة والعافية للمبدع الشاعر عبدالله محمد خير الذى كان طريح الفراش الابيض فى الفترة الماضية نسأل الله ان يعافيه ويشفيه من كل داء وسقم وان يمتعه بيلصحة والعافية .

يا قمره
صديق أحمد
عبدالله محمد خير

يا قمره ... صبي السنسني الحمره
شوفي أبوي أنا الراجاهو كلو صباح
يا زينوبه أبوكي هو أصلو حالو بره
لو قاري العلم هو ولاهو سيد خبره
ومو زول غربه لكن الظروف جابره
مالو إن كان صبر كل الخلوق صابره
والصابرات روابح لو يجن قماح

هو أصلو متين نساكم يُمة شان يطره
بيتنفس هوا ذكراكم العطره
رهيف إحساس حنين قلبو بالفطره
نديمو بقت دموعو الديمه منقطره
وأصلو إن ما قعد بينكم ولا بيرتاح

جاهو العيد كمان زاد القليب حسره
ساد العبره حلقو ونفسو منكسره
هو لا لمّ القروش لا حصل المسره
بلد ما فيها زول مات من عدم كسره
فراقكم ليها يا أحباب ولا كان صاح

يا أمارتي الما طاعت الأمره
ندماني وبقت محتاره في أمره
بعد قسن الدرادر قصرن عمره
الشوق فاض وعماها الحنين غمره
الشوق للبلد لي بهجته وسمره
الشوق لي مقيلا ضم ضم تمره
الشوق لي حديثا ضم ضو قمره
الشوق للبلد جابريتا وككره
كان الشوق يخفف والله يبرى جراح

مشتاق للحسيناب أسقه وبكره
مشتاق للقبيل إتربوا فوق حكره
مشتاق للدميري ومويته العكره
مشتاق للجزيري وتشقه وهكره
مشتاق لي قطع بحره ودخول وكره
مشتاق للأبي يفارق الفؤاد ذكره
مشتاق للعلى مشغول دوام فكره
مشتاق للصباح ديدن غناي شكره
وياريت كت بقدر أسوي شوقي جناح.

المدير العام تاريخ التسجيل : 24/04/2008 العمر : 31

دروب الريد
صديق أحمد
عبدالله محمد خير

ريدكم لي شديد يا يابا ريدي أنا للبريدو شديد
إلا أنا ما معاكم ديمه لكن عن حبيبي بعيد
خلوني اللسافر أبوي لو كان في إجازة العيد
أمشي أزور حبيبي الغالي داير أوفي حق الريد
عشان يا يابا من يوم روح ما جاب لي منو بريد
وما قال لي وين يا زولي كيف عامل براك وحيد
ليشن يابا ما بترضوني ياني وليدكم الويحيد
خايف بكره ما تلقوني إلا تتلتولي القيد
شان شوق الحبيب مالكني والنار في ضلوعي تقيد
داير يابا أمشي وأزورو يمكن شوفتو لي تفيد
يابا عليك عطفك لي ما تخلوني أبكي شديد
ويابا إن كت بتدري البي ماب تأبى لي أبقى سعيد
يابا إن كت قادر أخلي كت خليتو بدري أكيد
زولاً حبو عاش في قلبي كيفن عن طريقو أحيد
كان يا يابا ما جربت تهواها الحسان الغيد
وكان يا يابا ما أشجاك صوت البلبل الغريد
وكان يا يابا ما ساهرت وعينيك ضاقن التسهيد
ما بتهتم بي أعذاري مهما أقول ومهما أعيد
دحين يا يابا ماك مشتاق وحيدك يبقى عندو وليد
يحوم في البيت ويلعب فيهو يمرح في براءه سعيد
يقول لي يمه يا حبوبه يا حبوبه عندي نشيد
يسعدني ويسر بال أمه ليك يا يابا يبقي حفيد
هاك يا يابا من أشعاري أبيات أنهكا الترديد
كم تاه في دروب الريده قلبي وكم نظم له قصيد.

المدير العام تاريخ التسجيل : 24/04/2008 العمر : 31

حبل الصبر
عبدالله محمد خير
صديق أحمد

تلب أمسك حبل الصبر خلو قلبك لا يبقي ني
أصلو ود أب زيد كل يوم من بلدنا يرحل جدي
شن بسويلك عاد أنا القبلك الحرمان مر بي
والضنا الهسا عليك زاد من زمان أنا زايد علي
كم حبيبا شغل الفؤاد في العيون كان متل الصبي
حل بي (توفيق) السواد مافي زول قال كفاره لي
أرقى يا تلب ودعت قبلو كم قمره منوره
وكم تحف نادرات سافرن وكم فراشه وكم جوهره
وكم قلوب متلك بالفراق الأنين والشوق سهره
شوف عوض عبدون الحروف خل من باطنه ظاهره
يا عوض مدرسة الشعر بي جداره إياك ناظره
بي غناك حرف السين بقت فوق بنات جيله مبطره
سابك اللى بلد الجليد ودعك ودقّ مغادره
يا قلب مالك انجرح ولسه ليه جرحك مابره
أما أنا المسكين الطروف غرزت في أظافره
وين غناي لي شتل الجروف والجناين وأزاهره
أسألوا الدرويش عن صديق عمرو كم جمرات عاصره
خلو يحكيلكم عن حياه النجيفى الهو معاصره
الككر يا رحمن زمان ضاع مع العشاق شاعره
مانفع تغريدو الحزين ما نفع صدق مشاعره
جننو (البتوفيق) رحل وهام ورا القام بالباخره
خلا دنياهو فرندقس ما عرف أوله وآخره
أرقى يا رحمن في السماح مافي بلداً بتجاكره
الله مديها سماحه صاح من كروها ولى تكره
أصلو ود أب زيد معترف بي جريمتو ومو ناكره
كلو جور القال سفروها وقطع ليها تذاكره.

تاريخ التسجيل : 05/05/2008 العمر : 30

يالله يا مبدع .. بالجد فنان الشاعر الكبير (( عبدالله محمد خير )) ..

انا سمعت انو مات .. بالجد يا ربي